رافضك يا زمانى
يا اوانى
يا مكانى
انا عايز اعيش فى كوكب تانى
فيه عالم تانى
فيه لسه امانى
فيه الانسان
لسه انسان
عايش للتانى
دى كلمات اغنية قديمة حبتين تلاتة اربعة كده بتاعة مدحت صالح
لما كنت بسمعها زمان كنت بقول ايه الكلام الغريب ده
عايز يعيش فين ده .. فى حتة عمرها ما هتبقى موجودة !!
بس دلوقتى وبعد ما عدى وقت طويل اوى
لقيت نفسى بقول نفس كلام الاغنية
انا عايزة اعيش فى مكان فيه الانسان لسه انسان عايش للتانى
كل الناس بيجى عليها فترات حزن,اكتئاب .. يعنى الحاجات الحلوة دى
بس اسباب الحاجات دى بتبقى مختلفة من واحد للتانى
بس للاسف اغلب الاسباب ان لم يكن كلها راجعة لان البنى ادم اللى بيحس بكده بيبقى من خلال معاملته مع اللى حواليه
هتلاقيه بيعانى من انه مفتقد حد كان مالى جزء كبير من حياته
هتلاقيه حاسس بانه قعد ده كله مش فاهم الناس صح وفى الاخر اتسك على دماغه
يعنى اشياء من هذا القبيل
.....
انا مش عارفة ده صح ولا لا
بس انا يمكن ماشية بمبدا فى تعاملى مع الناس "عامل الناس كما تحب ان يعاملوك به"
انا مقتنعة بالمبدا ده جدا
ويا سلام بقى لما يجى معاه "حب لاخيك ما تحب لنفسك"
كده يا استاذ انت بقيت صيده سهلة جدا للناس اللى ميستحقوش كده
وياه بقى لو كنت مع المبدأين دول تتمتع بصفة الجدعنة
كده انت ممكن تفنى عمرك كله فى خدمة الناس وهتبقى مبسوط اوى
بس يا ريتك تختار الناس الصح اللى تعمل معاهم كده
.......
مختصر الكلام
عم مدحت صالح لما قال انا عايز اعيش فى كوكب تانى فيه الانسان لسه انسان عايش للتانى
انا بقوله فى ناس كده وفى العالم اللى احنا عايشين فيه ده
فى ناس تلاقيها بتتعامل معاك عشان تعامل ربنا فيك
بس المشكلة ان الناس دى لازم تلاقى ناس تانية زيها عشان تتعامل معاها نفس المعاملة دى وميتخدعوش فيهم فى الاخر
ولا الناس تفتكر ان تسامحك وحبك وصدقك وجدعنتك معاهم هو ضعف منك
بالعكس دى منتهى القوة
بس زى ما فى ناس كده فى ناس تانية عايزة تاخد ومتديش حاجة
حتى مجرد الاحساس بيبقوا مستنيناك انت اللى تديه
.........
وفى الاخر احنا عايشين فى دنيا "وهى بصراحة اسم على مسمى" فيها كل انواع البنى ادمين ومضطرين نتعامل معاهم
بس الوقعات اللى الواحد بيقعها علمته ميديش امان مطلق لاى حد .. عشان ميضربش على قفاه فى الاخر
هو احنا عايشين فى الدنيا اه
بس عارفين .. احنا اللى مخليين الدنيا وحشة كده
يلا نراكم عما قريب ... انتظرونا
مع تحياتى
مواطنة مطحونة
